Attac

Attac á Íslandi boðaði til þessa fundar hér í kvöld vegna áforma um að einkavæða orkuauðlindir Ísland. Nú hefur orðið þar nokkur viðsnúningur, en ljóst er að stjórnvöld þurfa mikið, öflugt og stöðugt aðhald. Attac ætlar að fylgjast áfram með framgangi málsins og vill hafa sitt að segja, líkt og hinir fjölmörgu sem lagt hafa hönd á plóginn við að stöðva einkavæðingaráform stjórnvalda.

Attac eru alþjóðleg samtök sem berjast gegn einkavæðingu,  markaðsvæðingu og hnattvæðingu á forsendum stórfyrirtækja. Samtökin mynduðust í kjölfar hins mikla fjármálahruns í Austur-Asíu og víðar árið 1997. Við stöndum nú frammi fyrir öðru hruni, hruni íslenska efnahagskerfisins, og því að Alþjóðagjaldeyrissjóðurinn fer með yfirstjórn íslenskra efnahagsmála.

Það var einmitt AGS sem gerði illt verra í hruninu í Austur-Asíu með kröfum um frjálst fjármagnsflæði, og hér á landi gengst AGS fyrir því að einkavæða sem allra mest, þar á meðal verðmætar orkuauðlindir landsins. Hrunið er notað sem tækifæri til að hrinda svokölluðum efnahagsumbótum í framkvæmd.

Kjörlendi hamfarakapítalistanna er að flytjast frá "þriðja heiminum" til Evrópu og fyrstu viðkomustaðirnir eru lönd á jaðri álfunnar, þar á meðal Ísland,  Grikkland og Ungverjaland. AGS er ólýðræðisleg stofnun, fulltrúi peningafla heimsins, alþjóðlegur innheimtulögfræðingur. Eins og dæmin sýna virðist meginmarkmið stofnunarinnar vera að gera þau verðmæti upptæk sem enn er að finna í löndum sem nauðbeygð leita aðstoðar alþjóðasamfélagsins, og afhenda verðmætin alþjóðaauðvaldinu. Ungverjar hafa nú vísað AGS á dyr og ættu Íslendingar að fylgja fordæmi þeirra.

Í dag birti DV niðurstöður skoðanakönnunar sem Capacent gerði fyrir Teit Atlason bloggara. Þar kemur fram að 85% landsmanna eru andvíg því að náttúruauðlindir séu seldar erlendum aðilum, hvað þá vafasömum skúffufyrirtækjum. Engar auðlindir eru eins verðmætar nú á tímum og orkuauðlindir. Íslendingar eiga miklar auðlindir, en þær eru ekki ótæmandi. Þær munu ekki falla í verði, síður en svo. En þær koma að litlu haldi verði þær afhentar einkaaðilum á silfurfati, hvað þá að þær verði fullnýttar í hvelli til að nota í stóriðju.

Krafan er því að orkufyrirtækin, framleiðsla og dreifing, verði tekin af markaði. Á meðan þau eru á markaði er sífellt hætta á því að Magma-ruglið endurtaki sig æ ofan í æ, hvort sem fjárfestirinn er íslenskur eða kanadískur, pólskur eða búlgarskur.

Almenningur hefur fengið sig fullsaddann af orðræðu nýfrjálshyggjunnar um frjálst fjármagnsflæði sem drifkraft framfara. Almenningur hefur fengið sig fullsaddann af einkavæðingu, einkavinavæðingu og markaðsvæðingu. Samfélagið þarfnast efnahagslegs öryggis, á það hefur verið ráðist með grimmilegum hætti af fjármagnsöflunum og við verðum að reisa varnir, byggja veggi sem geta skýlt okkur fyrir slíkum árásum. Það hefur enginn gert fyrir okkur, allra síst ríkisstjórnin. Stefnubreyting ríkisstjórnarinnar nú hefur verið knúin fram með markvissu átaki og baráttu fjölda fólks. Fjöldasamstaða ber árangur!

 Við krefjumst þess að ríkisstjórnin hlíti vilja þjóðarinnar, að orkuauðlindir verði teknar af markaði.

Takk fyrir.

Ég er kominn hér sem talsmaður átaksins orkuauðlindir.is, en áskorun okkar Bjarkar Guðmundsdóttur og Oddnýjar  Eirar Ævarsdóttur til stjórnvalda um að stöðva söluna á HS Orku til Magma og til Alþingis um að efna til þjóðaratkvæðagreiðslu um eignarhald á orkuauðlindunum og nýtingu þeirra hefur nú verið undirrituð af nær 16.000 manns.

 Markmið okkar var og er enn að vekja upp umræðuna um þennan gjörning, einkavæðingu orkuauðlindanna áður en það væri um seinan.

Fyrsti áfangi virðist hafa náðst -  að fá fram umræðuna:

Stjórnvöld hafa látið undan þrýstingi og nú er leikinn biðleikur sem óvíst er um hvernig fer.

Efnt skal til rannsóknar og möguleikar kannaðir – það er allt gott og blessað að því gefnu að vel verði að þessari rannsókn staðið. Við bíðum niðurstöðunnar.

Hins vegar höfum við bent á það pólitískur vilji er allt sem þarf en staðreyndin er sú að stjórnarflokkarnir eru ekki sammála um stefnuna – vonandi ná  þeir áttum – og leggja málið í dóm þjóðarinnar . Í þessu sambandi vil ég benda á að samkvæmt skoðanakönnun  sem fjallað er um í fjölmiðlum í dag og Capacent mun hafa unnið fyrir Teit Atlason bloggara eru tæplega 85% landsmanna andvígir því „að erlendir aðilar geti keypt íslenskar náttúruauðlindir“. Aðeins 4,5% voru hlynntir, en 10,6% sögðust enga skoðun hafa á málinu.

En sagan af  einkavæðingu HS Orku er um margt á huldu. Við höfum lagt áherslu á að birta þurfi upplýsingar um ferlið allt og lýsa því hvernig hér er í pottinn búið.

Eins og fram hefur komið sendum við umboðsmanni Alþingis ábendingu um ýmis atrið sem við teljum ástæðu til þess að skoða varðandi þetta ferli allt - við því höfum við ekki fengið önnur svör en þau að Umbi taki sér lögformlegan tíma (allt að fjórar vikur) til þess að kanna hvort hann ætli að taka ábendinguna til greina.

Þá höfum við sent 3 ráðuneytum, Orkuveitu Reykjavíkur og þeim sveitarfélögum sem tengast málinu, beint eða óbeint, beiðni um að fá afhent öll gögn:

“er varða samskipti viðkomandi  yfirvalda og starfsmanna þess við Magma Energy Sweden AB, Magma Energy Corp Canada, Ross Beaty, Geysir Green Energy, Ásgeir Margeirsson, HS Orku og tengda aðila”

Einnig óskuðum við eftir “afritum af minnsblöðum af fundum  með ofangreindum aðilum, og afritum af minnisblöðum og greinargerðum starfsmanna er varða Magma Energy, HS Orku, GGE og tengda aðila.” eins og segir í bréfi okkar.